ALÞJÓÐLEGIR SAMSTARFSKLASAR

Danmörk

​

Copenhagen Fintech er danskur fjártækniklasi sem hefur það að markmiði að gera Kaupmannahöfn að einni helstu miðstöð fyrir fjártækni í heiminum með því að styðja við og hvetja til tæknilegrar þróunar og nýsköpunar í fjármálum.

Svíþjóð

​

Findec er miðstöð fjártækni í Svíþjóð og styður við fjártæknifyrirtæki með tengslaneti, þekkingarmiðlun og samvinnu. Findec stuðlar að nýsköpun í fjártækni með auknu markaðsaðgengi, aðstoð við sprotafyrirtæki og aðgengi að sérhæfðum mannauði.

Skotland

​

FinTech Scotland styður við þróun skoskra fjártæknifyrirtækja og nýsköpun í fjártækni þarlendis. Klasinn leiðir saman frumkvöðla, fjármálastofnanir, opinberar stofnanir, fjárfesta, neytendur, tæknifyrirtæki og háskóla.

Svíþjóð

​

Sthlm Fintech Week er árleg fjártæknivika sem fer fram í Stokkhólmi. Áhersla er lögð á miðlun þekkingar og að byggja upp innviði sænskrar fjártækni. Yfir vikuna koma saman helstu stofnanir, fyrirtæki og sérfræðingar í fjártækni, deila og miðla þekkingu sinni og fræðast um það sem er að gerast í fjártækni. Þar má finna fyrirlestra, umræður og fleiri viðburði um ýmis málefni innan fjártækni.

Spánn

​

European Blockchain Convention er árleg bálkakeðjuráðstefna sem fer alla jafna fram í Barcelona. Markmið ráðstefnunnar er að styðja við notkun bálkakeðjutækni í Evrópu. Hún var fyrst haldin árið 2018 og hefur síðan árlega laðað til sín mikinn fjölda gesta, fyrirtækja, fjárfesta og fræðimanna úr bálkakeðjuheiminum.

Ísrael

​

Fjártækniklasinn í Tel Aviv var stofnaður 2014 og hafa um 30.000 einstaklingar starfað á vettvangi hans. FinTech Aviv starfar með og þjónar öllum þáttum fjártæknivistkerfisins, þ.m.t. fjártæknifyrirtækjum, frumkvöðlum, stærri fyrirtækjum, alþjóðlegum bönkum og tryggingafyrirtækjum, sem og fjárfestum.

Bretland

​

Level 39 í London veitir fjártæknifyrirtækjum aðgengi að viðskiptavinum, mannauði með sérþekkingu og innviðum til að styrkja starfsemi sína. Level 39 var stofnað árið 2013 og er í eigu Canary Wharf Group.

Sviss

​

Samtökin stuðla að þróun svissneska fjártæknivistkerfisins. SFTA styður við fjölbreyttan hóp einstaklinga, sprotafyrirtækja, fjárfesta, fyrirtækja og annarra hagsmunaaðila. Þau styrkja stöðu Sviss sem leiðandi alþjóðleg miðstöð fjártækni með því að skipuleggja viðburði, tengja saman hina ýmsu hagsmunaaðila, stunda rannsóknir, gefa út skýrslur, bjóða upp á ráðgjöf og vinnustofur, mæla fyrir bættum reglugerðum og efla félagsmenn sína og fjártæknivistkerfið bæði í Sviss og á alþjóðavettvangi.

Kanada

​

Fjármálaklasinn í Québec, Finance Montréal, var stofnaður 2010. Stefna klasans er að stuðla að framþróun og eflingu fjármálakerfis Québec með því að efla alþjóðleg viðskiptatengsl og laða erlend fyrirtæki til Montréal.

Finnland

​

Finnski fjártækniklasinn Fintech Farm er hluti af fyrirtækinu HUB13 og hefur leitt saman fyrirtæki innan fjártæknigeirans í Finnlandi. Fintech Farm stuðlar að tengslamyndun og nýsköpun innan fjártæknigeirans, í Finnlandi, á hinum Norðurlöndunum og alþjóðlega.

Noregur

​

NCE Finance Innovation er fjártækniklasi staðsettur í Bergen í Noregi. Þeirra markmið er að efla fjártækniumhverfið í Noregi, með því að ýta undir nýsköpun í tækni og samvinnu milli tækni- og fjármálafyrirtækja. Í klasanum eru 75 aðilar, staðsettir víðsvegar um Noreg.

Noregur

​

The Factory er staðsett í Osló í Noregi og er einn stærsti fjártækniklasi á Norðurlöndunum.

Klasinn vinnur mikið með öðrum fjártækniklösum, bæði á Norðurlöndunum og víðar, til þess að skapa tækifæri fyrir nýsköpunarfyrirtæki þvert á landamæri. The Factory var stofnað árið 2015 og hefur upp á að bjóða stærstu hraðla á Norðurlöndunum fyrir fjártækni, fasteignatækni (e. proptech), tryggingatækni (e. insurtech), reglutækni (e. regtech), gervigreind og bálkakeðjur.